කොමර්ෂල් බැංකුව ඇමෙරිකා එක්සත් ජනපදය පදනම් කරගත් ප්‍රකට ගෝලීය මූල්‍ය සඟරාවක් වන ග්ලෝබල් ෆයිනෑන්ස් වෙතින් ලෝකයේ හොඳම බැංකු සඳහා පැවැත්වූ 30 වැනි වාර්ෂික සම්මාන උළෙලේදී ‘ශ්‍රී ලංකාවේ හොඳම බැංකුව’ සඳහා වන සම්මානය ලබා ගත්තේය. බැංකුව විසින් මෙම සම්මානය දිනාගත් 21වැනි අවස්ථාව මෙය වෙයි. සම්මානලාභී බැංකු දුෂ්කර වෙළෙඳපොළ තත්වයන් තුළ තම ගනුදෙනුකරුවන්ගේ අවශ්‍යතා හඳුනාගෙන, ඒ සඳහා ප්‍රවේශමෙන් සහ අනාගත සාර්ථකත්වය සඳහා අඩිතාලම දමමින් ශක්තිමත් ප්‍රතිඵල ලබාගත් බැංකු බව ග්ලෝබල් ෆිනෑන්ස් සඟරාව අවධාරණය කර ඇත.
හොඳම බැංකු තෝරා ගැනීමේදී එම බැංකුවල දත්ත මත පදනම් වූ සහ විෂයානුබද්ධ නිර්ණායකයන් ඇගයීමට ලක්කර තිබේ. දත්ත මත පදනම් වූ නිර්ණායක ලෙස වත්කම්වල වර්ධනය, ලාභදායිත්වය, භූගෝලීය ප්‍රවේශය, උපාය මාර්ගික සබඳතා, නව ව්‍යාපාර සංවර්ධනය සහ නිෂ්පාදනවල නවෝත්පාදනය සැලකිල්ලට ගෙන ඇති අතර විෂයානුබද්ධ නිර්ණායකවලට කොටස් විශ්ලේෂකයින්, ණය ශ්‍රේණිගත කිරීමේ විශ්ලේෂකයින්, බැංකු උපදේශකයින් සහ ක්ෂේත්‍රයට සම්බන්ධ වෙනත් අයගේ අදහස් ඇතුළත් විය. මෙම සම්මානලාභීන් තෝරා ගනු ලබන්නේ ලොව පුරා සිටින කර්මාන්තයේ විශ්ලේෂකයින්, ආයතනික විධායකවරුන්, බැංකුකරුවන් සහ බැංකු උපදේශකයින්ගේ මත සැලකිල්ලට ගනිමිනි.
