March 5, 2024
ක්‍රියාකරීත්වය හා බහුකාර්ය හැකියාවන්ගෙන් පරිපූර්ණ වෙමින් කොමර්ෂල් බැංකුවේ eSlip යෙදවුම නවීකරණය වෙයි
පුවත්

ක්‍රියාකරීත්වය හා බහුකාර්ය හැකියාවන්ගෙන් පරිපූර්ණ වෙමින් කොමර්ෂල් බැංකුවේ eSlip යෙදවුම නවීකරණය වෙයි

Jan 23, 2024

මුදල් තැන්පත් කිරීමේදී බැරපත් වෙනුවට භාවිතා කළ හැකි ශ්‍රී ලංකාවේ පළමු යෙදවුම වන ‘eSlip’ යෙදවුම සඳහා කොමර්ෂල් බැංකුවෙන් නව විශේෂාංග මාලාවක් එළිදක්වා ඇත.

‘eSlip’ යෙදවුම මගින් ගනුදෙනුකරුවන් හට මුදල් තැන්පතු ක්‍රියාවලිය නවීන ලෙස සිදු කිරීමට හැකියාව ලබා දෙයි. එමගින් ගනුදෙනුකරුවන්ට ශාඛාවට යන අතරමග දී ම තම දුරකථනයෙන් ඉලෙක්ට්‍රොනිකව මුදල් බැරපත පිරවීමට හැකියි. ඩිජිටල් බැංකුකරණයේ ශක්තිය භාවිතා කරමින් තිරසාරභාවය ප්‍රවර්ධනය කිරීම මෙහි අරමුණ වේ. බැංකුවට පිවිසි පසු ගනුදෙනුකරුවන් හට කවුන්ටරය වෙත කඩිනමින් ගොස් තමන්ගේ ගිණුමට හෝ වෙනත් කොමර්ෂල් බැංකු ගිණුමකට මුදල් තැන්පත් කිරීමට හැකියි.

මෙම යෙදවුම නවීකරණය තුළින් හඳුන්වා දී ඇති විශේෂාංග මගින් මුදල් කවුන්ටරය හරහා සිදුවන තැන්පතු වේගවත්ව හා පහසුවෙන් සිදු කිරීමට අවස්ථාව ලබා දෙයි. මෙය ගනුදෙනුකරුවන්ට මෙන්ම මුදල් කවුන්ටර කාර්යමණ්ඩලයට ද තම කාර්යයන් ඉතා පහසු කරයි. එමෙන්ම මෙමගින් ඔවුන්ව නව්‍යෝත්පාදනය හා බැඳුනු හරිත අනාගතයක් කරා ගෙනයන ක්‍රියාදාමයක කොටස්කරුවන් බවට පත් කරන බව බැංකුව පවසයි.

මෙහිදී යෙදවුම භාවිතා කිරීමේදී පරිශීලකයා පෙර සිටම බැංකුව සමඟ සම්බන්ධතා පැවති ගනුදෙනුකරුවෙක් ද යන්න ස්ථිර කිරීම සඳහා හැඳුනුම්පත් ලේඛනවල නිරවද්‍යතාවය පරීක්ෂා කිරීමේ නව විශේෂාංගයක් හඳුන්වා දී ඇත. මෙම යෙදවුම භාවිතා කිරීමට කොමර්ෂල් බැංකුවේ ගිණුමක් තිබීම අනිවාර්ය නොවේ.

හඳුන්වා දී ඇති ‘eSlip Groups’ විශේෂාංගය මගින් යෙදවුම භාවිතාකරන්නන් හට එක් QR කේතයක් සඳහා eSlip 10ක් දක්වා සෑදිමේ හැකියාව ලබා දෙයි. මෙම විශේෂාංගය මගින් ගිණුම් කීපයකට මුදල් තැන්පත් කිරීමේ අවශ්‍යතා ඇති ගනුදෙනුකරුවන්ට එක් QR කේතයක් යටතේ එම තැන්පතු පහසුවෙන් කිරීමට හැකියාව ලැබෙන බව බැංකුව පවසයි.

‘eSlip’ යෙදවුම් පරිශීලකයන් හට සම්පූර්ණ කළ සියලුම eSlip ගනුදෙනුවල PDF රිසිට්පත් ලබා ගැනීමට හැකිවීම තවත් නව විශේෂාංගයකි. එමගින් වට්ස්ඇප්, ඊමේල් සහ වයිබර් වැනි සමාජ මාධ්‍ය ජාලා හරහා එම රිසිට්පත් හුවමාරු කරගැනීමට ද හැකියාව ලබා දී ඇත.

කොමර්ෂල් බැංකුව ශ්‍රී ලංකාවේ විශාලතම පුද්ගලික අංශයේ බැංකුව වන අතර ලෝකයේ හොඳම බැංකු 1000 අතරට ඇතුළත් වූ පළමු ශ්‍රී ලාංකේය බැංකුව ද වේ. බැංකුව මේ වනවිට දිවයින පුරා විහිදුනු බැංකු ශාඛා ජාලයක් සහ ස්වයංක්‍රීය යන්ත්‍ර 964 ක් ක්‍රියාත්මක කරයි. ශ්‍රී ලංකාවේ සුළු සහ මධ්‍යම පරිමාණයේ ව්‍යාපාර වලට විශාලතම ණය සම්පාදනය කරන්නා මෙන්ම දේශීය බැංකු ක්ෂේත්‍රයේ ඩිජිටල් නව්‍යකරණය සඳහා ප්‍රමුඛයෙකු වන කොමර්ෂල් බැංකුව බංග්ලාදේශය තුළ ශාඛා 20 ක් ද මියන්මාරයේ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ්‍රී ලංකාවේ බැංකු අතර පුළුල්තම ජාත්‍යන්තර පිය සටහන තබා ඇති වාණිජ බැංකුව ද වේ.

Leave a Reply

Your email address will not be published. Required fields are marked *