ප්රකට ආයතනික නායකත්ව උපදේශකයකු, කථිකාචාර්යකු හා කතුවරයකු වන මහාචාර්ය සේනක විජේසිංහ මහතාගේ නවතම ග්රන්ථය වන “චේගෙන් ඉගෙන ගත හැකි නායකත්ව පාඩම” ජූලි 1 වැනිදා මීගමුවේදී පැවති උත්සවයකදී නිල වශයෙන් එළිදැක්විණි. ලොව ප්රකට විප්ලවවාදී චරිතයක් ලෙස ඉතිහාසයට එක් වී ඇති චේ ගුවේරාගේ ජීවිතය සහ නායකත්ව ගුණාංග නවීන නායකත්වයේ දෘෂ්ටිකෝණයෙන් විග්රහ කරන මෙම කෘතිය දේශපාලන මතවාද පිළිබඳව සාකච්ඡාවකට වඩා ඔහුගේ දැක්ම, අධිෂ්ඨානය, කැපවීම, අභියෝග හමුවේ නොසැලෙන ආත්ම ශක්තිය හා පරිවර්තනීය නායකත්වය තුළින් වර්තමාන සමාජයට හා ව්යාපාර ලෝකයට ගත හැකි පාඩම් ඉදිරිපත් කරයි. ව්යාපාර නායකයන්, ව්යවසායකයන්, කළමනාකරුවන්, විධායක නිලධාරීන්, විශ්ව විද්යාල සිසුන් හා නායකත්ව සංවර්ධනය පිළිබඳ උනන්දුවක් දක්වන සියලු දෙනා වෙනුවෙන් ලියැවී ඇති මෙම ග්රන්ථය ඉතිහාසය තුළින් නායකත්වයේ සදාකාලික මූලධර්ම හඳුනා ගෙන ඒවා නූතන සංවිධාන හා පෞද්ගලික ජීවිතයට ප්රායෝගිකව යොදා ගත හැකි ආකාරය පැහැදිලි කරයි.
කෘතිය එළිදැක්වීමේ අවස්ථාවට ව්යාපාර නායකයන්, විශ්ව විද්යාල ආචාර්යවරුන්, වෘත්තිකයන් හා ආරාධිත අමුත්තන් රැසක් එක් වී සිටි අතර නායකත්වය පිළිබඳව නව අදහස් ඉදිරිපත් කරන වැදගත් ග්රන්ථයක් ලෙස එය ඔවුන්ගේ ඇගැයීමට ලක් විය. උත්සවය අමතමින් මහාචාර්ය සේනක විජේසිංහ මහතා සඳහන් කළේ සැබෑ නායකත්වය යනු බලය හෝ තනතුර නොව අරමුණක් වෙනුවෙන් මිනිසුන් ප්රේරණය කරමින් ඔවුන් එක් දැක්මක් කරා මෙහෙයවීමේ හැකියාව බවයි. ඉතිහාසයේ විශිෂ්ට චරිතවල අත්දැකීම් විවේචනාත්මකව අධ්යයනය කිරීමෙන් වර්තමාන සංවිධාන හා සමාජය මුහුණ දෙන අභියෝගවලට වටිනා මඟ පෙන්වීම් ගත හැකි බවද ඔහු පෙන්වා දුන්නේය. නායකත්වය, පෞද්ගලික විශිෂ්ටත්වය හා සංවිධානික පරිවර්තනය පිළිබඳ මහාචාර්ය විජේසිංහ මහතාගේ දැනුම් සම්භාරයට තවත් වටිනා එකතු කිරීමක් වන මෙම කෘතිය නූතන කළමනාකරණ හා නායකත්ව සාහිත්යයට වැදගත් දායකත්වයක් ලෙස සැළැකේ. දේශපාලන සීමා ඉක්මවා ගිය විශ්වීය නායකත්ව ගුණාංග පිළිබඳව ගැඹුරු අවබෝධයක් දෙන මෙම ග්රන්ථය අනාගත නායක පරපුරට මඟ පෙන්වන ප්රයෝජනවත් කෘතියක් වන බව විචාරකයන්ගේ අදහසයි.
