March 4, 2024
ජෝන් කීල්ස් සමූහයේ පෝෂණ වැඩසටහන යටතේ දරුවන්ගේ අධ්‍යාපනය හා පෝෂණය වැඩිදියුණු කිරීමේ මෙහෙවරට වසරක් සපිරේ
පුවත්

ජෝන් කීල්ස් සමූහයේ පෝෂණ වැඩසටහන යටතේ දරුවන්ගේ අධ්‍යාපනය හා පෝෂණය වැඩිදියුණු කිරීමේ මෙහෙවරට වසරක් සපිරේ

Nov 6, 2023

2022 වසරේ අගෝස්තු මාසයේදී ශ්‍රී ලංකාවේ සංචාරයක නිරත වීමෙන් අනතුරුව, එක්සත් ජාතීන්ගේ ජාත්‍යන්තර ළමා අරමුදල හෙවත් යුනිසෙෆ් හි දකුණු ආසියානු කලාපීය අධ්‍යක්ෂ ජෝර්ජ් ලැරියා- ඇඩ්ජේ මහතා මෙසේ පැවසී ය: “ශ්‍රී ලංකාවේ ජනගහනයෙන් අඩකට වැඩි ප්‍රමාණයකට කිසියම් ආකාරයකට හදිසි සහන අවශ්‍යයි. දරුවන්ගේ අධ්‍යාපනය වසර දෙකක කාලයක් පුරා විවිධාකාර බාධාවන්ට ලක් වූ  අතර, දරුවන් පාසල් වෙත නොපැමිණීම නිසා මෙය තවදුරත් ගැටලුවක් ලෙස පවතිනවා. දැනට පවතින අර්බුදය නිසා දරුවන්ගේ අධ්‍යාපනයට කිහිප අයුරකින් බාධා එල්ල වී තිබෙන බව පැහැදිලියි. අර්බුදයට පෙර ඔවුන්ට පාසලෙන් ලැබුණු උණුසුම් හා පෝෂ්‍යදායී ආහාරපාන තවදුරටත් ඔවුන්ට ලැබෙන්නේ නැහැ.”

ශ්‍රී ලංකාවට ආර්ථික අර්බුදයට මුහුණ දීමට සිදු වූ මුල් කාලයේදීම ජෝන් කීල්ස් සමූහය විසින් සෞඛ්‍ය හා පෝෂණය, අධ්‍යාපනය සහ ජීවනෝපාය මාර්ග සංවර්ධනය යන ප්‍රධාන අංශ තුන යටතේ බහුවිධ අර්බුද ප්‍රතිචාර වැඩසටහනක් ක්‍රියාවට නංවන ලදි. මෙහි සෞඛ්‍ය හා පෝෂණය අංශය යටතේ අධ්‍යාපන අමාත්‍යාංශය සමග එක් වී ‘පාසල් දිරිය’ නමින් පෝෂණ වැඩසටහනක් ක්‍රියාවට නැංවීමට ජෝන් කීල්ස් සමූහ ව්‍යාපාරය කටයුතු කළේ ය. ලෝක ළමා දිනය සැමරීමක් වශයෙන් 2022 ඔක්තෝබර් 03 දින නිල වශයෙන් දියත් කරන ලද මෙය, පසුගිය වසරක කාලය තුළ දිවයින පුරා දරුවන් දහස් ගණනකට සෙත සැලසූ වැඩසටහනක් විය.

මෙම වැඩසටහන මෙහෙයවන ලද්දේ ජෝන් කීල්ස් සමූහ ව්‍යාපාරයේ ප්‍රජා සත්කාර අංශය වන ජෝන් කීල්ස් පදනම විසිනි. ජෝන් කීල්ස් සමූහයට අයත් Ceylon Cold Stores (Elephant House), Cinnamon Hotels & Resorts, Jaykay Marketing Services (Keells) සහ John Keells Properties යන සමාගම් ඊට සක්‍රීය ලෙස දායක විය. මෙම වැඩසටහනේ විශේෂත්වයක් වන්නේ, හුදෙක් දරුවන්ට පෝෂණීය ආහාර ලබා දීමෙන් නොනැවතී, පාසලට පැමිණීමට ඔවුන් දිරිගැන්වීම, අධ්‍යාපනික හා විෂය බාහිර ක්‍රියාකාරකම්වල යෙදීමට ඔවුන් යොමුකරවීම සහ සමස්තයක් ලෙස ඔවුන්ගේ යහපැවැත්ම පිළිබඳව සැලකිලිමත් වීම ය. එමෙන්ම තම මහජන දායකත්ව අරමුදල් (Crowd funding) පදනම හරහා පාරිභෝගිකයන්ගේ සහ පරිත්‍යාගශීලීන්ගේ නොමසුරු දායකත්වය ලබාගැනීමෙන් මෙන්ම, තම ප්‍රධාන හවුල්කරුවෙකු වන සර්වෝදය ඇතුළු විවිධ හවුල්කරුවන්ගේ සහයෝගය සමගින් තම ‘Keells ළමා පෝෂණ වැඩසටහන’ තවදුරටත් ශක්තිමත් කිරීමට කීල්ස් සමාගමට හැකියාව ලැබිණි.

ආරම්භයේ සිට මේ දක්වා මෙම පෝෂණ වැඩසටහන නැගෙනහිර, දකුණ සහ බස්නාහිර යන පළාත්වල තෝරාගත් පාසල් 12 ක පාසල් හා පෙරපාසල් දරුවන් මෙන්ම මධ්‍යම, උතුරු මැද, වයඹ, සබරගමුව, දකුණු සහ බස්නාහිර යන පළාත්වල පෙර පාසල් 34 ක දරුවන් 4,187 දෙනෙකු සඳහා ආහාර වේල් 469,812 ක් ලබා දී ඇත. මීට අමතරව දරුවන් වෙනුවෙන් පෝෂ්‍යදායී ආහාර පිළියෙල කිරීම පහසු කිරීම සඳහා පාසල් 10 ක නිසි පහසුකම් සහිත මුළුතැන්ගෙවල් ඉදිකිරීම සහ ප්‍රජා උද්‍යාන 31 ක් ස්ථාපිත කිරීම ඇතුළුව සමස්ත ව්‍යාපෘතිය සඳහා මේ දක්වා ආයෝජනය කර ඇති මුදල රු. මිලියන 52 ඉක්මවයි.

“පාසල තුළදී දරුවන් වඩාත් ක්‍රියාශීලීව හැසිරෙනු අපට පෙනෙනවා. එමෙන්ම, පාසලේ විධිමත් ලෙස ක්‍රීඩා කටයුතු සිදු නොවුණත්, තම විවේක කාලවලදී ඔවුන් වැඩි වැඩියෙන් ක්‍රීඩාවල යෙදෙනු අපට දැකගන්නට පුළුවන්.” කොළඹ 02 මේරියම් බාලිකා පාසලේ විදුහල්පතිනිය පැවසුවා ය.

“ප්‍රමාණවත් තරම් ආහාර නොලැබීම නිසා පාසල් පැමිණෙන දරුවන් සංඛ්‍යාව පහළ ගොස් තිබුණා. එහෙත් ජෝන් කීල්ස් පෝෂණ වැඩසටහන ක්‍රියාත්මක කිරීමත් සමග දරුවන්ට පාසලේදී පෝෂ්‍යදායී ආහාර වේලක් ලැබෙන නිසා ඔවුන් පාසල් පැමිණීමේ ප්‍රවණතාව සැලකිය යුතු මට්ටමකින් වැඩි වී ඇති බව අපට පෙනෙනවා.” මවක සහ පාසල් ආහාර සැපයුම්කාරිනියක වන අයීෂා රිල්වාන් මහත්මිය පැවසුවා ය.

මෙම වැඩසටහන තිරසාර ලෙස පවත්වාගෙන යාම සහ ඉදිරියේදීත් දරුවන්ට අඛණ්ඩව පෝෂ්‍යදායී ආහාර ලැබෙන බව තහවුරු කර ගැනීම සඳහා ජෝන් කීල්ස් පදනම මේ වනවිට පියවර රැසක් ගෙන තිබේ. පාසල් තුළ මුළුතැන්ගෙවල් ඉදිකිරීම සහ පාසැල තුළින් සහ ඉන් පිටතින් ලැබෙන සහයෝගයන් ශක්තිමත් කිරීම ඒ අතරින් ප්‍රධාන තැනක් ගනී. මෙය ප්‍රජාවන් වඩාත් ක්‍රියාශීලී සහ ස්වයංපෝෂිත කිරීමට දායක වීම සඳහා ජෝන් කීල්ස් සමූහය දරන උත්සාහයට මනා සාක්ෂියකි.

කොළඹ කොටස් වෙළඳ පොළේ විශාලතම ලැයිස්තුගත සමාගම වන ජෝන් කීල්ස් හෝල්ඩින්ග්ස් පීඑල්සී පරිපාලිත සමාගමක්ද වේ. විවිධාංගීකෘත කර්මාන්ත අංශයන් 7ක පවතින සමාගම් 70කට වැඩි ප්‍රමාණයක් මෙහෙයවනු ලබන JKH ආයතනය සේවක සේවිකාවන් 14,000 කට අධික පිරිසකට රැකියාවන් ලබා දෙන අතර වසර 18 ක් පුරා ශ්‍රී ලංකාවේ වඩාත් ගෞරවනීය ආයතනය ලෙස LMD සඟරාව මගින් ශ්‍රේණිගත කර ඇත. ‘ට්‍රාන්ස්පේරන්සි ඉන්ටර්නැෂනල් ශ්‍රී ලංකා’ විසින් සිදු කරන ලද ආයතනික වාර්තාකරණයේ විනිවිදභාවය ඇගයීමේ සමීක්ෂණයේදී ජෝන් කීල්ස් හෝල්ඩින්ග්ස් පීඑල්සී අඛණ්ඩව තුන්වන වසරටත් ප්‍රථම ස්ථානයට පත් විය. ලෝක ආර්ථික සංසදයේ පූර්ණ සාමාජිකයෙකු සහ එක්සත් ජාතීන්ගේ ගෝලීය සංයුක්තයේ සහභාගිකයෙකු වන ජෝන් කීල්ස්, ජෝන් කීල්ස් පදනම හරහා සහ සමාජ ව්‍යවසායකත්ව මුලපිරීම හරහා “බලගන්වමු දේශය හෙට දිනට” පිළිබඳ දැක්ම මෙහෙයවන අතර, Plasticcycle සමාජ ව්‍යවසායකත්ව වැඩසටහන හරහා ශ්‍රී ලංකාවේ ප්ලාස්ටික් දූෂණය සැලකිය යුතු ලෙස අඩු කිරීමේ උත්ප්‍රේරකයක් ලෙසින් ද ක්‍රියා කරයි.

Leave a Reply

Your email address will not be published. Required fields are marked *