ලොව විශාලතම ජාත්‍යන්තර ගුවන් සේවය වන එමිරේට්ස්, පෙබරවාරි 04 වන දින ශ්‍රී ලංකාවේ 76වන නිදහස් දිනය සැමරීම උදෙසා සිය ගුවන් මගීන්ට සූපශාස්ත්‍ර උපහාරයක් ලබාදීමට කටයුතු යොදා ඇත.
බණ්ඩාරනායක ජාත්‍යන්තර ගුවන් තොටුපලේ පිහිටි එමිරේට්ස් මගී විවේකාගාරය අලංකාර කර මෙම උත්සවය සමරනු ලබයි. මෙහිදී පළමු සහ ව්‍යාපාරික පන්තියේ මගීන්ට සම්ප්‍රදායික උත්සව රසකැවිලි සහ උණුසුම් දේශීය ආහාර වේලක් පිරිනැමීමට කටයුතු යොදා ඇත.
උදෑසන ගුවන් ගමන් ආරම්භ කිරීමට පෙර මගී විවේකාගාරයට පැමිණෙන එමිරේට්ස් මගීන්ට ආස්මි සහ වැලි තලප වැනි දේශීය ශ්‍රී ලාංකීය ප්‍රණීත ආහාරවලින් තම උදෑසන ආහාරය මිහිරි කළ හැකිය. පසුව එදිනම එමිරේට්ස් මගී විවේකාගාරය විසින් දිවා ආහාරය සඳහා කහබත් සමඟ කජු ව්‍යංජන, මාළු ඇඹුල් තියල්, පොළොස්, බටු මෝජු, වැනි රසවත් ශ්‍රී ලාංකීය දිවා භෝජන සංග්‍රහයක් සමඟින් පාරිභෝගිකයින් සතුටු කරනු ඇත.
වර්ග අඩි 5,651කින් යුත් බණ්ඩාරනායක ජාත්‍යන්තර ගුවන් තොටුපලේහි පිහිටි එමිරේට්ස් මගී විවේකාගාරය 2012 ජුනි මාසයේදී විවෘත කරන ලද අතර, එය පළමු සහ ව්‍යාපාරික පන්තියේ මගීන්ට සහ ගුවන් සමාගමේ සම්මානලාභී නිරන්තර පියාසර වැඩසටහන වන ස්කයිවර්ඩ්ස් හි තෝරාගත් ස්ථරවල සාමාජිකයින්ගේ භාවිතය සඳහා වේ. එමිරේට්ස් ගුවන් සමාගම 1986 අප්‍රේල් මාසයේදී ශ්‍රී ලංකාවට මෙහෙයුම් ආරම්භ කළ අතර, පසුගිය වසර 37කට වැඩි කාලයක් කොළඹට සහ කොළඹ සිට මගීන් මිලියන 12ක් ප්‍රවාහනය කර ඇත. ගුවන් සමාගම දැනට Boeing 777-300ER ගුවන් යානා භාවිතා කරමින් කොළඹට සෘජු දෛනික ගුවන් ගමන් දෙකක් මෙන්ම මාලදිවයින හරහා අමතර දෛනික සේවාවක් ද සපයයි. පළමු පන්තියේ සේවාවන් සමඟින් මගීන්ට ලෝක මට්ටමේ නිෂ්පාදන සහ ගුවනේ සහ ගොඩබිමේ උසස් සුවපහසුව ලබා දෙන රටට සේවය කරන එකම ජාත්‍යන්තර ගුවන් සේවය එමිරේට්ස් ගුවන් සේවයයි.
