සෝනි සමාගම, ශ්‍රී ලංකාවේ ප්‍රමුඛතම කැමරා අලෙවි ජාලය වන CameraLK සමඟ එක්ව, ප්‍රවීණ ශ්‍රී ලාංකික වනජීවි ඡායාරූප ශිල්පියකු වන ලක්ෂිත කරුණාරත්න හට සෝනි සමාගමේ වනජීවී ඡායාරූපකරණය සඳහා කලාපීය තානාපති ධූරය පිරිනමා තිබේ. සෝනි සමාගම විසින් මෙම ධූරය සඳහා තෝරාගත් පළමු ශ්‍රී ලාංකිකයා ලෙස ලක්ෂිත කරුණාරත්න ගේ නම, අභිමානවත් ලෙස ඉතිහාසගත විය.
සෝනි, CameraLK, සහ ශ්‍රී ලංකාවේ නිර්මාණශීලී කලාකරුවන් ප්‍රමුඛ නියෝජිතයින්ගෙන් සහභාගීත්වයෙන් පැවති විශේෂ උත්සවයකදී මෙම තානාපති ධූරයට අත්සන් කිරීම සිදු කෙරිණි. ලක්ෂිතගේ පත් කිරීම, සිංගප්පූරුව, මැලේසියාව, තායිලන්තය, ඉන්දුනීසියාව, වියට්නාමය, පිලිපීනය, මොන්ගෝලියාව, නේපාලය, මියන්මාරය, බංග්ලාදේශය, ශ්‍රී ලංකාව, කාම්බෝජය සහ ඉන් ඔබ්බට දකුණු සහ අග්නිදිග ආසියානු කලාපය පුරා විහිදේ. ඔහුගේ ඡායාරූප නිර්මාණ මෙම කලාපය පුරා සෝනි වේදිකාවල විශේෂාංගගත කර ප්‍රකාශයට පත් කිරීම, සන්නාම තානාපතිවරයා ලෙස ඔහුට දක්වන ඉහළම ගෞරවයකි.
මෙම සුවිශේෂී පත්වීම ලක්ෂිතගේ අසාමාන්‍ය කුසලතාව, වනජීවීන් ගේ සොබා දහම හා බැඳුණු අතිශය දුර්ලභ සොඳුරු කතන්දර ගෙනහැර පෑම සඳහා ඇති කැපවීම සහ ශ්‍රී ලංකාවේ සොබාදහම සහ සංරක්ෂණ ඡායාරූපකරණයේ වර්ධනයට ඔහු දක්වන සැලකිය යුතු දායකත්වය අගය කළ අවස්ථාවකි. වනාන්තරවල දුර්ලභ හා ආකර්ෂණීය අවස්ථා ග්‍රහණය කර ගැනීමේ වසර ගණනාවක අත්දැකීම් සමඟින් ලක්ෂිතගේ ඡායාරූප, දේශීය සහ ගෝලීය වශයෙන් ප්‍රේක්ෂක ආදරය දිනා ගනිමින් තිබේ.
සෝනි ඉලෙක්ට්‍රොනික්ස් (සිංගප්පූරු) පුද්ගලික සමාගමේ කලාපීය අලෙවිකරණ සංවර්ධන මධ්‍යස්ථානයේ (RMDC), නියෝජ්‍ය අධ්‍යක්ෂ, බේ ජිහූන් අදහස් දක්වමින්, “ලක්ෂිතගේ පත් කිරීම අපගේ දකුණු සහ අග්නිදිග ආසියාවේ විශිෂ්ට නිර්මාණකරුවන්ට සහාය ලබා දීමේ මෙහෙවරේ වැදගත් අවස්ථාවක්. ඔහුගේ සුවිශේෂී දැක්ම සහ වනජීවී ඡායාරූපකරණය සඳහා ඇති කැපවීම, සෝනි සන්නාමයට සුදුසු නියෝජිතයකු බව පැහැදිලි ලෙස පෙන්වනවා.” යනුවෙන් පැවසී ය.
මේ සම්බන්ධයෙන් අදහස් දක්වමින් CameraLK කළමනාකාර අධ්‍යක්ෂ අනුෂ්ක ගුණසිංහ පවසා සිටියේ, “සෝනි සමාගම වැනි ගෝලීය දැවැන්තයෙකු විසින් ලක්ෂිතගේ පත් කිරීම ශ්‍රී ලංකාවේ ඡායාරූපකරණ ප්‍රජාව ලද විශාල ජයග්‍රහණයක්- CameraLK අපි දේශීය නිර්මාණකරුවන්ට ජාත්‍යන්තර වේදිකාවේ අත්දැකීම් සහ අවස්ථා ලබා දීමෙන් ඔවුන් බලගැන්වීමට සැමවිටම කැපවී සිටිනවා.” යනුවෙනි.
මෙම සුවිශේෂී පත්වීම පිළිබඳ ලක්ෂිත කරුණාරත්න පවසා සිටියේ, “සෝනි සමාගමේ කලාපීය තානාපති ලෙස පත්වීම මා ලද විශිෂ්ට ගෞරවයක්. ශ්‍රී ලංකාවේ වනජීවී ඡායාරූපකරණ සංස්කෘතිය ලෝක මට්ටමින් නියෝජනය කිරීමට හොඳ අවස්ථාවක් ලෙසයි මා එය දකින්නේ. මගේ කැමරා කාචය හරහා වනාන්තරයක සිට ලොවෙන් සැඟවුණු කතන්දර බෙදා ගැනීමට සහ සොබාදහම සමඟ ගැඹුරු සම්බන්ධතාවයක් ඇති කර ගැනීමට හැකිවීම සතුටක්.” යනුවෙනි.
සෝනි සමාගමේ කලාපීය තානාපති වැඩසටහන නිර්මාණශීලී වෘත්තිකයන් සවිබල ගැන්වීමට සහ ඔවුන්ගේ කුසලතා ඉස්මතු කිරීමට නිර්මාණය කර තිබේ. සෝනි වැනි ගෝලීය දැවැන්තයකු විසින් ලක්ෂිත වැනි ශ්‍රී ලංකාවේ නිර්මාණකරුවකු පිළිගැනීමට ලක් කිරීම රටක් ලෙස ශ්‍රී ලංකාව ලද ජයග්‍රහණයකි.
