ජාතික තොරතුරු හා සන්නිවේදන තාක්ෂණ විසඳුම් සම්පාදක SLT-MOBITEL, සමාජයේ හා පරිසරයේ යහපත උදාකරලීමේ ප්‍රයත්නයෙහි තවත් පියවරක් වශයෙන්, ගම්පොළ ජිනරාජ මහා විද්‍යාලය කේන්ද්‍ර කරගනිමින් තිරසර පාරිසරික, සමාජයීය හා යහපාලන වැඩසටහන් (Environmental, Social, Governance – ESG) මාලාවක් ක්‍රියාවට නැංවීමට කටයුතු කළේ ය.
මෙම වැඩසටහන් මාලාව ප්‍රධාන වශයෙන් ව්‍යාපෘති තුනකින් සමන්විත වූ අතර, එම පාසලේ දරුවන් සඳහා දීර්ඝකාලීනව යහපත් ප්‍රතිඵල උදාකර දීම එහි මූලික අරමුණ විය. ඒ සඳහා SLT-MOBITEL තවත් හවුල්කරුවන් කිහිප දෙනෙකු සමඟ අත්වැල් බැඳගැනීමට කටයුතු කළේ ය. ශිෂ්‍ය ව්‍යවසායකත්වය දිරිගන්වන ආකාරයට විද්‍යාව, තාක්ෂණය, ඉංජිනේරු විද්‍යාව සහ ගණිතය (Science, Technology, Engineering, and Mathematics – STEM) යන විෂයන් පාදක කරගනිමින් තොරතුරු තාක්ෂණය පිළිබඳව දැනුවත් කිරීමේ වැඩසටහන් ක්‍රියාවට නැංවීම, දරුවන් තුළ කියවීමේ රුචිය වර්ධනය කරවීම අරමුණු කරගත් ‘හිතක් ඇත්නම් පොතක් දෙන්න’ වැඩසටහන යටතේ පොත්පත් ප්‍රදානයක් සිදුකිරීම සහ Ogilvy Public Relations Sri Lanka සමඟ එක් වී රුක් රෝපණ වැඩසටහනක් ක්‍රියාවට නැංවීම එම ව්‍යාපෘති තුනයි.
SLT වෙනුවෙන් මෙම අවස්ථාවට එහි සාමාන්‍යාධිකාරී (ප්‍රාදේශීය මෙහෙයුම් – R1) අනුරුද්ධ රත්නායක මහතා සහ නියෝජ්‍ය සාමාන්‍යාධිකාරිනී (මහජන සම්බන්ධතා) නිලන්ති ජයකොඩි මහත්මිය සහභාගී වූහ. මීට අමතරව පාසලේ විදුහල්පතිතුමන්, ගුරු මණ්ඩලය හා ශිෂ්‍ය ශිෂ්‍යාවන්, Ogilvy Public Relations Sri Lanka හි නියෝජිතයන්, ගම්පොළ SLT-MOBITEL Customer Club නියෝජිතයන්, SLT-MOBITEL නිලධාරීන් සහ STEMUP Foundation හි ස්වේච්ඡා නියෝජිතයන් ඇතුළු විශාල පිරිසක් මෙම වැඩසටහන්වලට සහභාගී වූහ.
ගම්පොළදී මෙම රුක්රෝපණ වැඩසටහන ක්‍රියාත්මක කරන ලද්දේ SLT-MOBITEL ක්‍රියාවට නංවා ඇති ‘රට පුරා හුස්මයි පොහොරයි වගා කරමු’ වැඩසටහනේ එක් පියවරක් වශයෙනි. පරිසරය සුරැකීම, වනාන්තර විනාශ වී යාම මඟින් සිදුවන අහිතකර බලපෑම් අවම කිරීම සහ වඩාත් යහපත් පරිසර පද්ධති නිර්මාණය කිරීමට දායක වීම යන අරමුණු මූලික කරගෙන SLT-MOBITEL මෙම වැඩසටහන ක්‍රියාවට නංවා ඇත. මේ වනවිට මෙම වැඩසටහන යටතේ මොණරාගල, උමංදාව, අනුරාධපුර, කුණ්ඩසාලේ, මීරිගම සහ කළුතර වැනි ප්‍රදේශවල ශාක 1,7000 කට අධික සංඛ්‍යාවක් රෝපණය කර තිබේ.
