සියපත ෆිනෑන්ස් පීඑල්සී වෙතින් දෙවිනුවර ඇසළ පෙරහැර වෙනුවෙන් දැනුවත් කිරීම් පුවරු පරිත්‍යාගයක්

ශ්‍රී විෂ්ණු දෙවියන් මුල් කරගනිමින් ශ්‍රී ලාංකීය බෞද්ධ හා හින්දු බැතිමතුන් දහස් ගණනකගේ සහභාගීත්වයෙන් වාර්ෂිකව පැවැත්වෙන සුප්‍රකට දෙවිනුවර ඇසළ පෙරහැරේ ආරක්ෂක රාජකාරියේ යෙදී සිටින ගන්දර පොලිසියට එතෙක් අත්‍යවශ්‍යව පැවැති “වාහන නැවැත්වීම තහනම්” දැනුවත් කිරීම් පුවරු පරිත්‍යාග කිරීමට සියපත ෆිනෑන්ස් පීඑල්සී කටයුතු කොට තිබේ.

පංච තූර්ය නාදය පෙරටුකොට ගත් සාම්ප්‍රදායික නර්තන අංගයන්ගෙන් හා අලි ඇතුන්ගෙන් විචිත්‍රවත් වූ දෙවිනුවර ඇසළ පෙරහර නරඹන්නට දිවයිනේ නන්දෙසින් පැමිණෙන බැතිමතුන්ගේ වාහන තැනින් තැන නැවැත්වීමෙන් ඇතිවන තදබදය මගහරවාගැනීමට උපකාරීවන මෙම දැනුවත් කිරීම් පුවරු සියපත ෆිනෑන්ස් පීඑල්සී වෙනුවෙන් එහි මාතර ශාඛාවේ කළමනාකරු ජානක විපුල මහතා විසින් ගන්දර පොලිසියේ මූලස්ථාන පොලිස් පරීක්ෂක දේශබන්ධු සේනාරත්න මහතා වෙත භාරදෙන ලදී.

සම්පත් බැංකු සමූහයට පූර්ණ අනුබද්ධිත මූල්‍ය සමාගම වන සියපත ෆිනෑන්ස් පීඑල්සී 2005 වසරේ අරඹා ගතවූ වසර 19 ක කාලය ඇතුලත නව්‍යකරණයෙන් පිරිපුන් මූල්‍ය සේවා සම්පාදනය කිරීමෙහිලා කීර්තියක් අත්කරගන්නට සමත්ව සිටියි. සියපත ෆිනෑන්ස් පීඑල්සී දීප ව්‍යාප්ත ශාඛා ජාලයක් හරහා පළපුරුදු විශේෂඥ කාර්යය මණ්ඩලයක් සමග විශ්වාසනීය හෘද්‍යාංගම පාරිභෝගික සේවාවක් සපයමින් සුළු හා මධ්‍ය පරිමාණ ව්‍යාපාරිකයින්, කෘෂිකර්මාන්තයේ නියැලි ගොවීන්, වගාකරුවන් මෙන්ම කෘෂි ව්‍යවසායකයන්, ධීවර කර්මාන්තයේ නියැලී සිටින්නන් සහ කාන්තා ව්‍යවසායිකාවන් යනාදී වශයෙන් දිරියෙන් නැගීසිටින්නට වෙරදරන ශ්‍රී ලාංකිකයන් රැසක් සවිබල ගන්වා ඇත.