ශ්‍රී ලංකාවේ පුද්ගලික අංශයේ ප්‍රමුඛතම බැංකුව වන හැටන් නැෂනල් බැංකුව 2023/24 සඳහා ‘ඔබ වෙනුවෙන් අපි’ ක්ෂුද්‍ර මූල්‍ය ප්‍රදානය නැවත ලබා දීමට කටයුතු කරන බව පසුගියදා නිවේදනය කළේය. ඒ යටතේ තෝරාගත් ක්ෂ්ද්‍ර මූල්‍ය ව්‍යවසායකයින් 52 කට රුපියල් මිලියන 5.2ක් ලබා දීමට HNB කටයුතු කළේය.
ඒ වෙනුවෙන් මෙම වසරේ ක්ෂුද්‍ර මූල්‍ය ප්‍රදානය කිරීමේ උත්සවය පසුගියදා HNB ප්‍රධාන කාර්යාලයේදී පැවැත්වුණු අතර ඒ සඳහා HNB හි වැඩබලන ප්‍රධාන විධායක නිලධාරී දමිත් පල්ලෙවත්ත, ප්‍රධාන මෙහෙයුම් නිලධාරී සන්ජේ විජේමාන්න, ජ්‍යෙෂ්ඨ මානව සම්පත් නිලධාරී කේ. ඉන්ද්‍රවාසන් යන මහත්වරුන් ඇතුලු බැංකුවේ ආයතනික හා ඉහළ කළමනාකාරීත්වයේ සාමාජිකයින් රැසක් එක්ව සිටියේය. එහිදී ව්‍යවසායකයින් 5 දෙනෙකු වෙත ව්‍යාපාර නගා සිටුවීමට සහ කුඩා හා මධ්‍ය පරිමාණ තත්වයන් වෙත ළඟා කර ගැනීම වෙනුවෙන් රු. 100,000 බැගින් ප්‍රදානය කිරීමට බැංකුව කටයුතු කරන ලදී.
මෙම මූල්‍ය ප්‍රදානයන් ධීවර, ඉදිකිරීම්, කෘෂිකර්මාන්ත, ඉංජිනේරු, ගොවිපළ, ආහාර සැකසුම් හා නිෂ්පාදන ඇතුළු විවිධ අංශ වෙත ලබා දීමට කටයුතු කර ඇත. එහි අරමුණ වන්නේ ආර්ථික දුෂ්කරතා මධ්‍යයයේ තම ව්‍යාපාරවල ඵලදායීතාව ඉහළ නැංවීමට, වැඩි දියුණු කිරීම් වෙනුවෙන් ආයෝජනය කිරීමට හා ජීවනෝපාය පවත්වා ගැනීමට පුද්ගලයින් සහ ව්‍යාපාරික අංශ සවිබල ගැන්වීමයි. එසේම කුඩා හා මධ්‍ය පරිමාණ ව්‍යවසායකයින් පීඩාවට පත් කරන ගැටළුකාරී තත්වයන් අවම කිරීමේ උත්සාහයක් වන මෙම ප්‍රදානය තුළින් ඉහළ යන පිරිවැය, සීමිත ණය ලබා ගැනීමේ හැකියාව හා බලපෑමට ලක් වූ ප්‍රජාවන්ගේ ආර්ථික හැකියාව හා වර්ධනය ඉහළ නැංවීම සිදු කරන අතරම දියුණු තාක්ෂණය සමඟ කටයුතු කිරීමේ හැකියාවද ඔවුන්ට ලබා දෙයි.
මේ පිළිබඳව අදහස් දැක්වූ HNB හි ප්‍රධාන මානව සම්පත් නිලධාරී කේ. ඉන්ද්‍රවාසන් මහතා පැවසුවේ “ස්ථාවරත්වයට පත් වෙමින් පවතින ශ්‍රී ලංකාවේ ආර්ථිකය ක්ෂුද්‍ර මූල්‍ය ව්‍යවසායකයින් හට තමන්ගේ ව්‍යාපාර පවත්වාගෙන යාමට, ශක්තිමත් කිරීමට හා ප්‍රමාණය වැඩි කිරීමට මෙය කදිම අවස්ථාවක්. අපගේ ගනුදෙනුකරුවන් සවිබල ගන්වමින් රටේ සංවර්ධනය වෙනුවෙන් නිරන්තරයෙන් දායක වන HNB හි ‘ඔබ වෙනුවෙන් අපි’ ක්ෂුද්‍ර මූල්‍ය ප්‍රදාන වැනි වැඩසටහන් ශ්‍රී ලංකාවේ ව්‍යවසායක ක්ෂේත්‍රයේ ශක්තිය හා දියුණුව සඳහා වූ උපාය මාර්ගික ආයෝජනයක් ලෙස සඳහන් කළ හැකියි” යනුවෙනි.
වැඩි දුරටත් අදහස් දැක්වූ ඒ මහතා සඳහන් කර සිටියේ “එම ව්‍යවසායකයන්ට අවශ්‍ය සම්පත් හා දිරිගැන්වීම් ලබා දීම තුළින් ඔවුන්ගේ අභියෝග ජය ගැනීමට හා දියුණුව කරා යාමට අවශ්‍ය ශක්තිය ලබා දීමට අපි අරමුණු කරගෙන තිබෙනවා. අපගේ මෙම ප්‍රදානයන් තුළින් ඔවුන්ගේ කාරක ප්‍රාග්ධනය ඉහළ නංවා ගැනීමට හෝ වෙනත් ඕනෑම ආයෝජනයක් තූලින් ඔවුන්ගේ හැකියාව ඉහළ නංවා ගනු ඇතැයි අපි බලාපොරොත්තු වනවා. එය මෑතකදී සිදුවූ ආර්ථික කඩා වැටීමෙන් පසුව යළි දෙපයින් නැගී සිටීමට ඔවුන්ට සුවිසල් අත්වැලක් වනු ඇති බව අපගේ විශ්වාසයයි” යනුවෙනි.
2020/2021 වසරේදී ආරම්භ කරනු ලැබූ HNB හි තිරසාරත්ව පදනමෙහි අරමුණ වූයේ ක්ෂුද්‍ර මූල්‍ය ව්‍යවසායකයින් වෙත තමන්ගේ ව්‍යාපාර නැවත ආරම්භ කිරීමට හා කඩිනම් කිරීමට අවශ්‍ය සහයෝගය ලබා දීමයි. HNB හි ආධාර මත ගොඩ නැගුණු ඒ තුළින් මෙරට ව්‍යවසායකයින් 348 දෙනෙකු වෙත රුපියල් මිලියන 34.8ක් ප්‍රදානය කිරීමට සමත්ව ඇත.
