NKAR Travels and Tours පෞද්ගලික සමාගමේ 45 වැනි සංවත්සරය වෙනුවෙන් සංවිධානය කළ පාපැදි සවාරියක් ජුනි 29 කොළඹදී පැවැත්විණි. කිලෝමීටර් 20ක දුරකින් යුතු ඊට සහභාගී වූ කාර්ය මණ්ඩල සාමාජිකයන්, කර්මාන්ත සහකරුවන් සහ අන්තර්ජාතික නියෝජිතයන් ඇතුළු පාපැදිකරුවෝ NKAR සන්නාමය සහිත ටී-ෂර්ට්වලින් සැරසී සිටියහ. එම සවාරියේදී කොළඹ දිස්ත්‍රික්කයේ පිහිටි ප්‍රධාන ස්ථාන රැසක් ආවරණය විය. “Charity Challenge by Team NKAR” යනුවෙන් නම් කර තිබූ එම සවාරිය සමාගමේ කළමනාකරණ අධ්‍යක්ෂ හා සභාපති නිල්මින් නානායක්කාර මහතාගේ සංකල්පයකි. කාර්ය මණ්ඩලය විසින් අදාළ සම්බන්ධීකරණ කටයුතු සිදු කරන ලදී.
සංචාරක ක්ෂේත්‍රයට සහ සමාජයේ අභිවෘද්ධියට NKAR සමාගම වසර 45ක් පුරා දැක්වූ දායකත්වය සැමරීම, මෙරට පාපැදි සංචාරක ක්ෂේත්‍රය තුළ ඔවුන්ගේ සහභාගිත්වය තහවුරු කිරීම, තිරසාර ප්‍රවාහන මාධ්‍යයක් ලෙස පාපැදිය ප්‍රවර්ධනය කිරීම සහ ප්‍රජා මූලික වැඩසටහන් සඳහා දායකත්වය දැක්වීම මෙම වැඩසටහනේ ප්‍රධාන අරමුණු අතර විය. එහිදී රැස් කර ගත් අරමුදල් අවශ්‍යතා සහිත පුද්ගලයන්ට රෝද පුටු මිල දී ගැනීමට යොදා ගන්නා ලදී. රෝද පුටු හතරක් පරිත්‍යාග කිරීම මූලික සැළැසුම වුණත් ප්‍රමාණවත් පරිත්‍යාග ලැබුණු බැවින් අවසානයේදී රෝද පුටු අටක් පරිත්‍යාග කිරීමට හැකි විය. පාපැදි සවාරිය අතර කුඩා පරිමාණ වීදි වෙළෙන්දන් ඇතුළු කුඩා ව්‍යාපාරවලින් අවශ්‍ය ආහාර පාන සපයා ගැනීම විශේෂ සිදුවීමකි. කාර්ය මණ්ඩලය අතර කණ්ඩායම් බැඳීම සහ සෞඛ්‍යවත් ජීවන රටාවක වැදගත්කම ප්‍රවර්ධනය කිරීමටද හේතු වූ පාපැදි සවාරියට ආරාධිත අමුත්තන් සහ ව්‍යාපාර හවුල්කරුවන් ඇතුළු 120කට අධික පිරිසක් සහභාගී වූහ. එහිදී අදහස් දක්වමින් නානායක්කාර මහතා මෙම වැඩසටහන සාර්ථක කර ගැනීමට සහාය වූ සහ පැමිණ සිටි සියලු දෙනාට ස්තුතිය පළ කළේය. ඔහු පැවසුවේ මෙවැනි වැඩසටහන් තුළින් ඉදිරියටත් සංචාරක ක්ෂේත්‍රයේ සහ සමාජයේ දියුණුවට දායක වීමට NKAR සමාගම බලාපොරොත්තු වන බවයි. 45 වන සංවත්සරය වෙනුවෙන් ඉදිරි මාස කිහිපය තුළ තවත් වැඩසටහන් මාලාවක් සංවිධානය කර ඇති අතර පාපැදි සවාරිය ඉන් පළමුවැන්න වේ.
